Archivos de categoría: Noticias Ferrolterra

Manifestación en Ferrol

Mais de 40000 persoas saíron á rúa en protesta polos recortes do goberno de Rajoi

Ao Naval dí que sí

Os traballadores e traballadoras de Navantia da Ría de Ferrol saímos de novo á rúa, para poñer en coñecemento da cidadanía desta comarca a delicada situación que atravesamos na nosa empresa, e para informar de primeira man de por que nos estamos a mobilizar desde hai máis dun ano, cales son as nosas demandas e que obxectivos tratamos de acadar

Os traballadores de Navantia repartindo información polas rúas de Ferrol

Navantia, empresa pública participada ao 100% pola Sociedade Estatal de Participacións Industriais (SEPI), é referencia a nivel nacional e internacional, capaz de competir con outros estaleiros do mundo en prezo, calidade e prazos de entrega. Como proba, o acordo asinado con Noruega para a construcción de cinco fragatas, que supuxo case 10 anos de traballo e unha facturación de 1.100 millóns de €, en competencia cos mellores estaleiros, sendo ata aquel momento o maior contrato de exportación en España.

No ano 2007 fixémopnos cun dos maiores contratos internacionais de construcción de buques militares, impoñéndonos a estaleiros como o estadounidense Gibbs&Cox ou o francés DCN. Referímonos ao acordo asinado con Australia para a construcción de dous megabuques e o deseño de tres destrutores, o cal significou un contrato de 1.300 millóns de €.

Que nos deixen facer aquelo que sabemos; se os dous exemplos anteriores sitúan a Navantia como empresa punteira na construcción naval militar, nos estaleiros da Ría temos máis que amosada a nosa capacidade, tamén para a construcción civil. A experiencia en artefactos off-shore, a especialidade na reparación de buques e a actividade desenvolvida pola fábrica de turbinas aportan coñecemento dabondo para despexar calquera dúbida acerca das nosas posibilidades competitivas fronte aos mellores estaleiros do mundo, aos que superamos en moitas ocasións.

Ademais de ser unha referencia a nivel mundial, somos un piar fundamental para a economía da comarca. En Ferrolterra a construcción naval representa o 40% dos empregos do sector industrial. No ano 2011, en Navantia Fene-Ferrol traballamos unha media de 5.500 persoas, entre o cadro de persoal da principal e o da industria auxiliar, e creáronse preto de 12.000 empregos complementarios; dito doutra maneira: a plena ocupación dos estaleiros da traballo a máis de 17.000 persoas traballadoras na comarca. No ano 2010, case o 3,5% do emprego de toda a provincia da Coruña xerouse en Navantia, e a súa producción supuxo o 3% do PIB da provincia.

Ao sector naval da Ría de Ferrol acábaselle o tempo: ou se consiguen novos contratos con urxencia ou a partir do verán verámonos afrontando a maior crise na historia do sector nesta comarca. Será a partir de entonces cando nos quedaremos tan só coa construcción do último buque para a Armada australiana. No último medio ano xa se destruíron preto de 1000 empregos na industria auxiliar e, sen considerar as áreas de Reparacións ou de Turbinas, se non somos quen de cambiar a situación, antes de rematar o 2012 perderemos preto doutros 1500 e o máis probable é que nese tempo nos atopemos con obradoiros completamente pechados, situación nunca antes vivida en Navantia.

Adecuar as nosas instalacións, ademais de servir para ser máis competitivos, tamén na área de Reparacións Fene-Ferrol, é hoxe unha prioridade que non só suporía evitar a destrucción de emprego, senón que, a traverso do Departamento de Carenas, situaríanos en condicións de xeralo en máis de 400 persoas de maneira indefinida.

Ante a situación xeral de crise e o particular esceario dos centros de Navantia na Ría de Ferrol, cando estamos a falar dunha comarca da Comunidade Galega duramente castigada, onde o paro xa afecta a máis de 20.000 persoas, ningún Goberno pode situarse á marxe desta situación nin tampouco permitirse o luxo de renunciar á creación de preto de 500 postos de traballo.

Esiximos o cumprimento dos compromisos asinados coa SEPI/Goberno de España que, a día de hoxe, seguen pendentes de execución e dos que subliñamos a contratación da 6ª fragata (F 106), ou buque similar, para a Armada Española.

 

Reclamamos unha maior implicación do Goberno de España nas accións comerciáis actuais e futuras de Navantia, AS CONTRATACIÓNS PARA A ARMADA ESPAÑOLA OU EXTRANXEIRAS son contratos de tal envergadura económica, que sen o apoio do Goberno de España non é posible conseguilos. Isto sabenno ben países como Francia, onde o apoio de Sarkozy foi determinante no acordo para a construcción de 2 megabuques para a Armada Rusa, ou Alemania, para quedar na fase final do concurso (lista corta) de cara á contratación do ALHD para Noruega.

Non podemos esperar un día máis, sabemos que é no ámbito político onde se teñen que tomar medidas respecto á construcción do DIQUE FLOTANTE. Estamos a falar dunha obra que daría ocupación case de inmediato aos centros que estamos a quedarnos sen carga de traballo, dunha obra que empregaría preto de 1000 persoas durante máis de 2 anos e que, unha vez construido, permitiríanos competir nun novo tipo de mercado de Reparacións de Buques ao que hoxe non podemos acceder por non dispor dunha infraestrutura das características da que estamos a demandar.

Temos que rachar coa inseguridade que pesa sobre NAVANTIA, os silencios dos Gobernos de Galicia e de España, as noticias contradictorias e sen fundamento que aparecen nalgúns medios non eliminan as inquedanzas das plantillas nin axudan a dar tranquilidade as nosas familias. Superados tres meses de Goberno do Partido Popular, cando a novo Presidente de SEPI foi nomeado polo Consello de Ministros o pasado 13 de xaneiro, ninguén entende a interinidade da actual Dirección de Navantia.

Os traballadores e traballadoras de Navantia que, no recente proceso electoral, escoitamos de todos os candidatos que visitaron Ferrol que o seu compromiso era defender os estaleiros públicos e atender a nosa demanda de CARGA DE TRABALLO, non compartimos nin entendemos que, a día de hoxe, non haxa máis que meras declaracións e venta de fume a través dos medios de comunicación.

Unidos por unha mesma causa, as plantillas de Navantia e da Industria Auxiliar, xunto cós cidadáns da comarca, temos que traballar arreo para propiciar que os gobernos de Galicia e de España muden a actitude pasiva que manteñen e que decidan favorablemente respecto a nosas xustas demandas.

Son eles os que teñen a obriga política de actuar, son eles os que dispoñen de capacidade económica para tomar decisions e resolver a difícil situación pola que estamos a pasar os estaleiros da Ría, a pequeña empresa e o comercio ferrolán.

Estas son as nosas prioridades e as razóns que nos empuxan a mobilizarnos de maneira permanente den de hai ben máis dun ano:

NOMEAMENTO DA DIRECCIÓN DE NAVANTIA.

CARGA DE TRABALLO PARA O NAVAL DA RÍA.

ELIMINACIÓN DO VETO Á CONSTRUCCION CIVIL.

FUTURO PARA OS ESTALEIROS E PORVIR PARA A COMARCA.

A empresa está en perigo, está en xogo o porvir económico das Comarcas de Ferrolterra, Eume e Ortegal, a supervivencia da zona depende de que consigamos o que estamos a demandar: CARGA DE TRABALLO, XA.

Por último, situadas as preocupacións fundamentáis no naval da Ría, agradecendo de antemán o apoio amosado en multitude de ocasións pola sociedade ferrolá e os concellos da bisbarra ante diferentes e complexas situacións vividas nos estaleiros, FACEMOS UN CHAMAMENTO A TODOS OS CIDADÁNS PARA QUE ASISTAN Á ASEMBLEA INFORMATIVA QUE OS COMITÉS DE NAVANTIA FENE-FERROL e DELEGADOS DA INDUSTRIA AUXILIAR CONVOCAMOS PARA O VINDEIRO 12 DE ABRIL, AS 13:00 HORAS, NA PRAZA DE ARMAS.

Internet Ferrol